Барселона и Лече постигнаа договор за позајмица на дефанзивецот Самуел Умтити до 30 јуни 2023 година во редовите на италијанскиот клуб. Нема опција за купување.

Лече минатата сезона ја освои италијанската Серија Б и сега се враќа на највисокото ниво на италијанскиот фудбал, Серија А.

Французинот дојде во Барса во летото 2016 година од Олимпик Лион. За шест сезони во редовите на каталонскиот гигант постигна два гола, забележа 133 настапи, од кои 91 во шпанската „Ла Лига“ и 22 во Лигата на шампионите.

Со Барселона по двапати ги освои „Ла Лига“ и шпанскиот Суперкуп, а трипати „Копа дел Реј“. Со француската репрезентација во 2018 година се закити со титулата светски шампион.

Лече ја стартуваше новата сезона во најсилното италијанско првенство со два порази од Интер и Сасуоло.