Црвениот крст по повод Светскиот ден на крводарителството се приклучи кон глобалната кампања за промоција на крводарителството под мотото „Дарувај крв и придонеси светот да продолжи да се движи”. Заедно со Институтот за трансфузиска медицина денеска им додели плакети на министерствата за здравство, за внатрешни работи и за одбрана во знак на благодарност за досегашната соработка, кои ги примија првите луѓе на овие институции министрите Венко Филипче, Оливер Спасовски и Радмила Шекеринска Јанковска.

Генералниот секретар на Црвениот крст, Саит Саити истакна дека во светот годишно се собираат 118 милиони крвни единици и доколку пет отсто од вкупното светско население би дарувале крв, тогаш сигурно би биле обезбедени потребните количества во светски рамки.

– За жал ова не е секогаш и секаде така. Високоиндустриските земји тоа го постигнуваат некако, но помалкуразвиените земји се уште не го постигнале. Ние како земја, за среќа наша, сето ова го постигнуваме и некаде нашите потреби од крв се програмираат на 55.000 крвни единици на годипно ниво, рече Саити.

Она што ние сега го постигнуваме датира од 1953 година кога Црвениот крст, Институтот за трансфузиона медицина и Министерството за здравство заедно работат на спроведување на програмата. Според Саити, во девеседетите години во земјата е постигнат максимумот на целите на концептот за максимум доброволно крводарување.

– Од 2010 до денес ги постигнуваме 55.000 програмирани крвни единици, кои значат целосно задоволување на потребите на здравствениот систем во државата, рече Саити нагласувајќи го позитивниот пример на припадниците на министерството за одбрана и за внатрешни работи, но и поддршката од Министерството за здравство.

Припадниците на Армијата, и покрај потешкотиите, учествувале во вкупната бројка на крводарување со околу 1800 до 1900 крвни единици, а не заостанува ни МВР.

– Сакаме да им одадеме признание преку вас, да ги поздравиме сите тие луѓе преку вас кои го направија тој потег за пример минатата година, рече Саити, кој повика да се дарува крв и да придонесеме светот да се движи понатаму.

Директорот на Институтот за трансфузиона медицина, Венко Стомнароски истакна дека минатата година била многу тешка, но оти се надминале сите предизвици.

– Поминавме една многу тешка година. Институтот за трансфузиона медицина беше ставен на многу голема одговорност. Се спремивме силно за да одговориме на предизвиците за да не бидеме критикувани од јавноста за да паднеме во искушение народот и нацијата да не остане без крв.  Се соочивме со тоа, но тоа треба да ни биде еден добар пример понатаму низ годините да бидеме спремни за секакви катасрофи, рече тој.

Министерката за одбрана Шекеринска Јанковска заблагодарувајќи се благодарницата од името на сите припадници на Армијата и МО, им честиташе на претставниците на Црвениот крст за тешката работа што ја завршија оваа година. Спасовски, пак, ги повика сите граѓани да даруваат крв затоа што на тој начин спасуваат живот.

На настанот имаше вклучување во живо во дневниот центар за дарување крв на Град Скопје и во Инстутот за трансфузиона медицина, каде крв даруваа припадници на Армијата и на МВР.