Сместено на брегот на Антарктичкиот полуостров, Порт Локрој е природно пристаниште со две посети на брод дневно во текот на летото, што го прави најпосетуваното место на Антарктикот.

Сигурно сте сонувале да избегате од работата што ја работите. Можеби не ви е лошо таму, но изморени сте од тоа да работите со истите луѓе и да ги слушате истите приказни. Секој што се чувствува вака, а кој е жител на Велика Британија може да направи нешто во врска со тоа.

Имено, UK Antarctic Heritage Trust (тимот кој се грижи за одржување на објектите на Антарктикот) регрутира нови членови за својот тим на Антарктикот, а апликациите се отворени за сите жители на Велика Британија.

Да, добро прочитавте, работата се нуди на најмалку населениот и најстудениот континент во светот. Базата Порт Локрој на Антарктикот, главната локација на добротворната организација, повторно регрутира за да ги исполни улогите на менаџер на базата, менаџер на продавницата, набљудувач на дивиот свет и, се разбира, управител на поштата за претстојната сезона од ноември 2024 до март 2025 година.

Порт Локрој минатиот месец ја прослави 80-годишнината и првично беше поставен како тајна мисија од Втората светска војна во 1944 година. Всушност, тоа е најстарата постојана британска база на Антарктикот.

Но, местото нема само интересна историја. Островот на кој се наоѓа, Гајдер, е со големина на фудбалско игралиште и дом на колонијата на посебен вид пингвини. Го посетуваат околу 15.000 луѓе годишно.

Звучи интересно? Па, според описот на работата, добротворната организација бара луѓе кои не само што се страстни за Антарктикот, туку и издржливи, физички подготвени и способни да се придржуваат до строгите протоколи. Оние кои ќе ја добијат работата ќе мора да издржат 24-часовна дневна светлина и да бидат без истечна вода цели пет месеци.

Инаку што се однесува до интересните факти за Порт Локрој, „Пингвин пост“ е најпосетуваното туристичко место на Антарктикот. Главната валута што се користи во поштата и продавницата за сувенири е американскиот долар, иако се прифаќаат и фунти и евра.

Посетителите можат да испраќаат писма и разгледници преку црвената поштенска кутија во Брансфилд Хаус, но може да бидат потребни недели додека да стигнат до својата дестинација. Секоја година, сезонскиот персонал испраќа приближно 70.000 разгледници во повеќе од 100 земји.