Обезбедени средства за целта Старото училиште во Љубојно да прерасне во Центар за промоција на македонскиот јазик

Промоција на иницијативата на Министерство за култура

Старото училиште ,,Димитар Влахов” во преспанското село Љубојно ќе се реконструира и ќе се адапира со 32,8 милиони денари од буџетот на Министерството за култура кои ќе бидат обезбедени во 2024 и во 2025 година.

Министерството за култура наведува дека заедно со Владата и Завод и музеј Битола презеле обврска старото училиште во Љубојно да биде обновено и да се ревитализира во чест на македонските дејци и во спомен на сите просветни работници.

– Во две буџетски години ќе биде обновено местото што е темел на нашиот културен и национален идентитет. Идејата е овој значаен објект, каде што се одвивала настава на македонски јазик, да стане собиралиште на лингвисти, педагози, наставници и професори по македонски јазик и да остане како паметник за генерациите по нас, дека темелите на ова здание се всушност историски темели на образованието на мајчин, македонски јазик, столбот на нашиот идентитет, наведува Министерството.

Старото училиште е во режим на заштита од 2020 година како дел од споменичната целина Љубојно. По неговото автентично обновување, овој монументален објект ќе биде Центар за промоција на македонскиот јазик.

За проектот, кој го реализира Завод и музеј Битола, во 2024 година се обезбедени 20 милиони денари, во 2025 година се проектирани 12,8 милиони денари.

Во периодот што следува, по заокружувањето на преостанатите административни процедури, надлежната установа ќе спроведе постапка за доделување договор за јавна набавка за реконструкција и адаптација на објектот.

Од Министерството наведуваат дека Завод и музеј Битола во изминатиот период ги презеде сите неопходни чекори за реализација на овој значаен проект, односно беа изработени Геодетскиот елаборат и Урбанистичко-архитектонскиот проект, чијшто составен дел беше Идејниот проект за објектот во село Љубојно. Во текот на оваа година се работеше на Основниот проект, кој по неговото комплетирање и реализација на сите ревидентски фази, беше испратен до Управата за заштита на културно наследство за добивање конзерваторско одобрение.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот