На три вакцинални пунктови во Скопје од утре почнува вакцинацијата против сезонски грип за ризичните групи граѓани кои изразиле интерес и за нив вакцината е бесплатна и ја обезбедува Министерството за здравство. За останатите граѓани, кои не спаѓаат во групата на ризични, обезбедени се 1.500 комерцијални вакцини, кои што од утре ќе бидат достапни во Центарот за јавно здравје Скопје по цена од 700 денари.

Обезбедени се 1.500 дози комерцијални вакцини против сезонски грип. Цената е 700 денари и може да се примат во Центарот за јавно здравје во Скопје, почнувајќи од утре, од 7 до 15 часот, изјави за „Слободен печат“ директорот на ЦЈЗ Скопје, доктор Бесим Зекири.

За ризичните групи граѓани пак,  кои изразија интерес на страницата Вакцинација.мк вакцината е бесплатна. 

Таа ќе се одвива на пунктовите Бит Пазар, Идадија и Букурешт. Таму треба да се појават само граѓаните кои претходно добиле СМС порака со потврда на терминот. Бесплатната вакцинација против сезонски грип е наменета за стари лица над 65 години, лица со хронични заболувања, здравствени работници, бремени жени и деца на возраст од 6 месеци до 5 години.

На пунктовите на Бит Пазар и Идадија работното време е од 8 часот наутро до 19 часот навечер, а Букурешт ќе работи само во втора смена, од 14 до 19 часот.

Министерството за здравство годинава нарача количини од вакцината против грип за 50 проценти повисока отколку лани. Изминатите години, поради пандемијата со ковид 19, грипот беше дијагностициран кај помал број граѓани.

Вакцините против сезонски грип пристигнаа во пунктовите, од утре почнува имунизацијата на ризичните групи