Писателот Петар Андоновски со неговите романи е на првото место меѓу најпродаваните автори на издавачката куќа „Полица“ за 2023 година. Пред самиот крај на годината, „Полица“ го објави неговиот најнов роман со наслов „Не кажувам“. И во новиот роман Андоновски отвора теми кои се актуелни во современото општество.

– Што е тоа што семејството го прави семејство? Постојат ли граници на љубовта меѓу родителите и децата што не смеат да се пречекорат? И колку кажување и некажување се потребни за здрав партнерски однос? Станува збор за возбудлива приказна за четворица родители, едно дете и многу некажани мисли и емоции.

Низ раскажувањето со препознатливиот стил на Петар Андоновски, остро како со скалпел се отвораат болните рани на нештата што ги сметаме за вредности. Со „Не кажувам“ Петар одново отвора особено важни прашања на кои сите треба да се замислиме и да дадеме одговор. „Не кажувам“ е меѓу првите или, можеби, првиот роман на Балканот кој ја обработува темата на квир-родителството – посочуваат од „Полица“.

Петар Андоновски е автор на романите „Очи со боја на чевли“ (2013), „Телото во кое треба да се живее“ (2015), „Страв од варвари“ (2018), „Лето во кое те нема“ (2020) и „Не кажувам“ (2023).

Добитник е на наградата „Роман на годината“ за романот „Телото во кое треба да се живее“ и на „Европската награда за литература“ за романот „Страв од варвари“.

Деновиве романот „Лето во кое те нема“ доби издание на словенечки јазик, а хрватското издание на романот „Страв од варвари“ во декември имаше промоција во Загреб, Хрватска.

(Текстот е објавен во „Културен печат“ број 214, во печатеното издание на весникот „Слободен печат“ на 19-21.01.2024)