Деменцијата е сериозна тема која предизвикува страв и паника кај многумина, но постојат едноставни, секојдневни навики кои можат да го намалат ризикот од когнитивно опаѓање. Невролозите веќе долго време тврдат дека здравиот начин на живот е клучен за здравјето на мозокот, а исхраната игра голема улога во тоа.

Освен тоа, една неодамнешна студија покажала дека секојдневна навика во исхраната е поврзана со помал ризик од деменција, дури за 12 отсто. Станува збор за секојдневно консумирање јаткасти плодови. Студијата анализирала податоци од повеќе од 50.000 возрасни и открила дека оние кои редовно јадат јаткасти плодови имаат помали шанси да развијат деменција.

– Јаткастите плодови содржат високо ниво на здрави масти, антиоксиданти, влакна и противвоспалителни соединенија кои го поддржуваат здравјето на мозокот. Исто така, јадењето јаткасти плодови позитивно дејствува и на цревниот микробиом, што е важно за здравјето на мозокот бидејќи може да спречи невродегенерација, како и да ги подобри когнитивните функции, здравјето на срцето и метаболизмот – објаснил доктор Дејвид Перлмутер за „Парад“.

Видовите јаткасти плодови се исто така важни за специфични придобивки.

– Оревите се богати со омега-3 масни киселини, корисни за здравјето на мозокот, додека бадемите и лешниците имаат високо ниво на витамин Е, кој ги штити мозочните клетки. Ф’стаците, пеканот и индиските ореви содржат антиоксиданти и хранливи материи кои ги поддржуваат когнитивните функции и метаболизмот – истакнува д-р Перлмутер.

Тој додава дека е доволна дневна порција од 28 грама јаткасти плодови и дека е исто така многу важно редовното консумирање.

– Секојдневното јадење јаткасти плодови има долгорочни придобивки за здравјето на мозокот и срцето, што може да го намали ризикот од деменција – заклучил лекарот.