Театарскиот колектив „Штрих“ го најави „Under 600“ – првиот фестивал што ги обединува независните театри од Западен Балкан, што ќе се одржи од 25 до 28 септември на различни локации во Скопје, а поддржан е од Британскиот совет.

Преку овој ревијален фестивал, публиката ќе има можност да се запознае со моменталните трендови и естетички тенденции во современиот независен театар во регионот, како и предизвиците со кои тој се соочува.

Како организатор на фестивалот, „Штрих“ ќе биде домаќин на 12 претстави и перформанси и тоа со фокус на македонската продукција. Програмата ја сочинуваат и настани за вмрежување, како и специјална програма со фокус на млади театарски уметници, која вклучува проследување на фестивалот од студенти од регионот и презентирање на две претстави. Овие активности се насочени кон поддршка на следните генерации театарски креатори и создавање на платформа за размена на искуства и соработка.

Со настани низ целиот град на јавни, алтернативни простори, кафулиња и неконвенционални локации, фестивалот ќе го потенцира проблемот со простор на независната сцена и креативните решенија што таа ги користи за да се справи со него. Регионалниот карактер на фестивалот дополнително овозможува создавање на една заедничка енергија, запознавање и заедничко согледување на творечките сличности и различности во регионот.

„Штрих“ е независен театар основан во Скопје во 2021 година, посветен на создавање слободен простор за творештво. Преку смели театарски продукции, издавање драмска литература и меѓународни соработки, нивната визија е да се подигне свеста за независниот театар и да се катализира уметничко и општествено влијание.

Мисијата на „Штрих“ е да ја разгори фантазијата, да ги предизвика перспективите и да ги обедини заедниците преку моќта на театарот. „Under 600“ е иницијатива за зајакнување на независниот театар во регионот на Западен Балкан, создадена од „Штрих“ заедно со „Дах театар“ од Србија и „Корифеј театар“ од Црна Гора.

Иницијативата започна со креирање онлајн платформа за споделување и комуникација во секторот, настани на фестивалите „Уметноста и човековите права“ на „Дах театар“ и „Корифеј фестивал“ во Колашин, Црна Гора. Фестивалот е главниот фокус на оваа програма. Оваа иницијатива е дел од проектот „Култура и креативност за Западен Балкан“ (CC4WBs), финансиран од Европската унија, кој има за цел да го подобри дијалогот во Западен Балкан преку зајакнување на културниот и креативниот сектор, како и развој на потенцијалот на секторот за социо-економско влијание во овој регион.

(Текстот е објавен во „Културен печат“ број 299, во печатеното издание на весникот „Слободен печат“ на 20-21.9.2025)