Џулија Робертс откри дека постои актерка пред која чувствува стравопочит и непријатност. Тоа е нејзината колешка од филмот „По ловот“, Клое Севињи, која, поради својата харизма и сериозен пристап кон работата, оставила силен впечаток кај познатата добитничка на Оскар, пренесува „Дејли Мејл“.

„Бев толку возбудена и исплашена што ја запознав Клое“, откри Џулија Робертс во интервју за „Верајети“. Таа го опиша и моментот кога Клое Севињи требала да пристигне во нејзиниот дом на проба за филмот.

„Седевме на кујнската маса, мојата ќерка Хејзел подготвуваше ручек и кога продуцентот објави дека доаѓа Клое, ја погледнав Ајо Едебири. Нашите погледи се сретнаа и реков: „Се плашам.“

Напнатоста наскоро била заменета со восхит, а емоциите го достигнале врвот кога Севињи признала колку ја цени Робертс.

„Откако се разделивме, чувствував дека ми треба повеќе Јулија. На летот кон дома, ги гледав нејзините филмови – „Нотинг Хил“, „Моето момче се жени“ … Само сакав повеќе од Јулија.“ Овие зборови ја расплакаа познатата актерка.

Севињи дополнително ја нагласи нивната поврзаност:

„Нè покани во својот дом на проби, а отидовме и во нејзината куќа на плажа. Беше исклучително дарежлива и топла.“

Режисерот Лука Гвадањино се надоврза на пофалбите, нагласувајќи ја топлината и грижата на Робертс.

„Јулија е одлична готвачка, од лосос до банана леб, таа прави сè со љубов. Таа е пријателка, мајка, личност која навистина се грижи за луѓето. И на снимањето, таа плени со својата енергија – ги знае сите членови на екипата по име, и тоа не е глума, туку нејзина природна љубопитност.“

И покрај сè, Робертс призна дека не ѝ било лесно да влезе во новата улога.

„Најтешкото нешто за мене беше потиснувањето на сочувството и емпатијата – што е против мојата природа. Навистина ме исцрпи“, рече таа.