Нетанјаху и Мнучин разговараа за опасноста од Иран
Израелскиот премиер во заминување Бенјамин Нетанјаху на денешната средба со американскиот министер за финансии Стивен Мнучин, истакна дека Иран почна да распоредува ракети во Јемен.
– Иран веќе тежнее да се снабди со прецизно оружје, кое може да ја погоди секоја мета на Блиски Исток, тоа се произведува во Иран и тие сакаат да го распоредат во Ирак и во Сирија, како и ракетниот арсенал од 130.000 ракети во Либан да ги претворат во прецизно оружје. Тие тежнеат кон тоа и веќе почнаа да го лоцираат во Јемен, за оттаму да го нападнат Израел, посочи Нетанјаху.
Мнучин вети заострување на економските санкции кон Иран, при тоа истакнувајќи дека „кампањата на максимален притисок” на Владата на САД ја запрела иранската агресија.
– Американските санкции имаат за цел да го принудат Иран да ги запре штетните активности и извоз на тероризам, како и стремежите да достигне нуклеарна способност, истакна Мнучин.
Тој ја предводи американската делегација при посетата на блискоисточните земји и Индија, чија цел е интензивирање на економските односи и антитерористичките иницијативи.
Во американската делегација е советникот и зет на американскиот претседател Џаред Кушнер, кој ќе се сретне со Нетанјаху и со лидерот на коалицијата Сино и Бело, Бени Ганц, кој е мандатор за составот на новата израелска влада.