Најновиот предлог на Европската комисија за прекин на увозот на руски гас го означува најрешителниот потег кон постепено укинување на горивото досега, но неговиот исход веројатно ќе биде во голема мера ограничен од правни и практични ограничувања, според анализата на „Оксфорд енерџи“, објавена од Националниот енергетски комитет на Србија, објави Политика.

Забраната за увоз и ограничувањето за користење на услугите за течен природен гас (ТНГ) вршат притисок врз учесниците на пазарот на ЕУ, но не гарантираат дека увозот според сите постојни договори ќе престане до потребните рокови.

Иако го зајакнуваат надзорот врз увозот на руски гас, предложените мерки наметнуваат значителни оптоварувања врз увозниците и другите засегнати страни, додека ризикуваат надминување на регулаторните ограничувања – особено ако се спроведат премногу енергично – потенцијално зголемувајќи ги трошоците и спречувајќи го легитимниот увоз на гас во ЕУ, се вели во анализата.

Ова, додава таа, би можело да има значителни последици за безбедноста на снабдувањето и потенцијално зголемување на цените и трошоците, особено во Централна и Југоисточна Европа.

Со оглед на тоа што на предлогот му недостасува механизам за решавање на веројатните несогласувања меѓу ЕК и земјите членки околу барањето за постепено укинување на рускиот гас во новоутврдените Национални планови за диверзификација, ЕК ќе мора да ги балансира интересите на земјите членки и ЕУ во согласност со принципот на енергетска солидарност, но таквата рамнотежа веројатно ќе биде тешка. Покрај тоа, сосема е можно некои земји членки едноставно да ја игнорираат секоја забрана.