Во вторник со почеток од 20.15 часот екипата на Вардар 1961 во СЦ „Јане Сандански“ – Скопје ќе го игра четвртфиналниот натпревар против Нексе од Хрватска за пласман на Ф4 турнирот во СЕХА газпром лига (2-4 септември во Задар).

Доколку скопските „црвено-црни“ бидат подобри, тогаш во полуфиналето ќе играат против ППД Загреб кој славеше минимално во Нови Сад против Војводина со 23:24.

Македонскиот шампион ја информираше јавноста дека влезници за утрешниот меч можете да купите онлајн на „мктикетс“.

По настапот на струшкиот турнир каде што го освоија четвртото место, ракометарите на Вардар сега се фокусирани кон првиот официјален меч во новата сезона.

Тренерот на клубот Владо Недановски вели дека е анализиран Нексе, иако се немаше доволно видео материјал, бидејќи мечевите кои ги играше овој противник беа од затворен тип.

– Зад нас е турнирот во Струга, што беше дел од нашите подготовки, за периодот кој следува, за претстојниот меч против Нексе. Имавме добри и лоши моменти на струшкиот турнир, сите играчи добија шанса, видовме кои можат да понесат поголем товар, а кои не. Нексе е добар тим кој пред два месеци играше Фајнал-фор турнир во Лигата на Европа, тоа не е случајно. Им замина еден играч, дојдоа двајца нови, значи составот им е ист. Една добро воиграна екипа која не менува многу, и нема потреба да менува бидејќи играше навистина добар ракомет во последните две сезони. Ние скоро секоја година играме против нив по два натпревари, лани не успеавме да добиеме ниту еден. Колку што можевме, направивме добри подготовки, се надевам на добар резултат на утрешниот дуел – вели Недановски.