Звучи како шега или беозбразен прекар, но „синдромот на мртов задник“ навистина постои. И тоа може да предизвика вистински проблеми. Ако поминувате премногу време седејќи, тоа може да има негативни последици врз мускулите на телото, особено на мускулите на задникот, односно на глутеусите. Во некои случаи, може да се развие и gluteus medius tendonitis, состојба позната и како глутеална амнезија или, во секојдневниот говор, синдром на мртов задник. Станува збор за мускулна дисфункција која го зафаќа средниот глутеален мускул, еден од трите мускули што ја сочинуваат групата глутеални мускули (со малиот и големиот глутеус). Овој мускул игра клучна улога во стабилизирањето на колковите и карлицата, а со самото тоа и во правилната рамнотежа и држење на телото. Кога часови и часови поминувате во седечка положба, без разлика дали се работи за компјутер, возење или гледање телевизија, средниот глутеусен мускул може предолго да остане во контракција, што ја намалува неговата функционалност. Со текот на времето, ова води до хипотрофија или мускулна слабост, што може да предизвика цела низа физички проблеми, пишува „Живим“.

Седење, седење и повторно седење

Седечкиот начин на живот е главната причина за овој синдром, но за неговиот развој исто така може да придонесе и неправилното држење на телото, долготрајната неактивност на тој мускул или тренингот без таргетни вежби. Колку оваа тема е важна за сите нас покажуваат податоците, според кои сè поголем број луѓе страдаат од болки во грбот токму поради седечкиот начин на живот. А глутеалната амнезија е состојба кога вашите глутеални мускули всушност забораваат што би требало да прават, што се случува токму поради поминување многу време седејќи и поради некористење на глутеусот. A ако мускулите на глутеусот не работат како што треба, зглобовите и другите мускули во долниот дел на грбот, колковите и долните екстремитети мора тоа некако да го компензираат, па се под поголемо оптоварување. Ова може да предизвика зголемен стрес на ‘рбетот, тетивите на колената, самите колена, па дури и на глуждовите. Сето ова може да резултира со голем број проблеми кои, на прв поглед, не изгледаат поврзани со задникот, како што се истегнување и исчашување на глуждовите и лигаментите, истегнување на тетивите во колената, болки во долниот дел на грбот или проблеми со рамнотежата. Проблемот е што глутеалната амнезија не се манифестира во раните фази. Вкочанетост и болка во задникот може или не мора да бидат присутни и често се откриваат само кога ќе почнат да се појавуваат проблеми со колковите, долниот дел на грбот, глуждовите и слично. Затоа, важно е да можете да ги препознаете симптомите и да реагирате навреме.

Симптоми на кои треба да обрнете внимание

Најчестите симптоми на синдромот на мртов задник вклучуваат:

– болки во грбот
– болки во колковите и мускулите на задникот
– вкочанетост или чувство на трнење и пецкање
– тешкотии при качување по скали
– проблеми со рамнотежата и стабилноста
– чувство на непријатност при преминување од седечка во исправена положба.

Многу луѓе на почетокот овие симптоми ги мешаат со други проблеми, како што се болки во грбот или болки во колковите, но игнорирањето на вистинската причина може да ја влоши состојбата.

Ако не реагирате, следуваат посериозни последици

Ако мускулите на глутеусот не работат правилно, телото ќе компензира со други мускули и зглобови, а тоа може да доведе до воспаление на колковите, дисфункција на мускулите на долниот дел на грбот, болки во колената и стапалата, промени во држењето на телото и начинот на одење, па сè до ишијас. Телото е систем во кој сите делови се меѓусебно поврзани и, кога еден мускул не функционира правилно, доаѓа до нерамнотежа што се манифестира во целиот мускулно-скелетен систем.

Како да го избегнете или „оживеете“ мртвиот задник

1. Станувајте секој час

Првиот чекор во спречувањето на синдромот на мртов задник е да се прекине седечкиот начин на живот. Ако работите на компјутер, станувајте секој час и пешачете пет минути. Нашиот ‘рбет е дизајниран за движење, а не за долго седење.

2. Правете таргетирани вежби за глутеусите

Некои едноставни, но делотворни вежби за зајакнување на глутеусот се сите видови мостови, клекнувања во сите варијации, планк, склекови и вежби на степер.

3. Не занемарувајте го истегнувањето

Истегнувањето е клучно, но често потценето. Но, неколку минути дневно се доволни за истегнување на мускулите на колкот, за намалување на напнатоста и за поддршка на правилното држење на телото. Некои вежби за истегнување може да се изведуваат дури и додека седите покрај работната маса.

4. Стискајте ги глутеусите кога и да се сетите

Она што можете да го направите баш во секоја прилика е свесно да ги активирате мускулите на задникот, односно да ги стегнувате и опуштате. Можете да го правите тоа во автобус, на работа, додека шетате и гледате излози…