Кошаркарите на Оклахома поведоа со 2:0 против Минесота во финалето на плеј-офот во Западната конференција на НБА лигата, откако синоќа победија дома со 118:103.

Најефикасен играч за Оклахома беше Шеј Гилџес-Александер со 38 поени, осум асистенции и три украдени топки. Џејлен Вилијамс додаде 26 поени, 10 скокови и пет асистенции, додека Чет Холмгрен постигна 22 поени.

Прв стрелец за Минесота беше Ентони Едвардс со 32 поени, девет скокови и шест асистенции. Џејден МекДениелс додаде 22 поени, додека Никел Александар-Вокер постигна 17 поени.

Комесарот на НБА, Адам Силвер, му ја додели на Гилџес-Александер наградата за најкорисен играч (МВП) во НБА за сезоната 2024/25 пред почетокот на натпреварот.

Победник во серијата е тимот што прв ќе забележи четири победи, а следниот натпревар е закажан за ноќта помеѓу сабота и недела во Минеаполис.

Победникот од оваа серија ќе игра во финалето на НБА плеј-офот против победникот на Истокот од дуелот помеѓу Индијана и Њујорк, каде Пејсерс водат моментно со 1:0 во серијата.