Членот на Куќата на славните, познатиот кошаркар Дикембе Мутомбо се наоѓа во Атланта каде се лекува од тумор на мозокот, соопшти денеска НБА лигата.

Мутомбо со години е глобален амбасадор на НБА лигата, а неодамна се појави на настаните во Куќата на славните во Спрингфилд, како и на претсезонските игри во Јапонија. Исто така, во август, 56-годишниот Мутомбо бил на настан во родното Конго заедно со генералниот секретар на САД, Ентони Блинкен.

– Тој ја добива најдобрата нега од тим специјалисти во Атланта и е во добро расположение на почетокот на неговото лекување. Дикембе и семејството бараат приватност за да се концентрираат на неговата грижа. Тие се благодарни за вашите молитви и добри желби – се вели во соопштението на семејството Мутомбо, објавено од НБА.

“Our thoughts and prayers are with Dikembe, one of the world’s great humanitarians.” – Adam https://t.co/Rxr0vzrmbS

— NBA (@NBA) October 15, 2022

Семејството не соопшти други детали или што довело до откривање на туморот.

Мутомбо помина 18 сезони во НБА, играјќи за Денвер, Атланта, Хјустон, Филаделфија, Њујорк и тогашните Њу Џерси Нетс и важи за еден од најдобрите блокери во историјата на НБА.

Познатиот центар беше осумкратен учесник во ол-стар натпреварот, четири пати беше најдобар одбранбен играч во лигата, трипати беше избран во најдобриот тим на лигата, а во 2015 година беше примен во Куќата на славните.

Последен пат играше во сезоната 2008/2009 и посветено работеше за хуманитарни цели. Зборува девет јазици и ја основаше Фондацијата Дикембе Мутомбо во 1997 година, фокусирајќи се на подобрување на здравјето, образованието и квалитетот на животот на луѓето во Конго.

Фондацијата изгради болница со 170 кревети во Киншаса, а таа установа лекуваше речиси половина милион луѓе без оглед на нивната способност да платат за нега.