Научници од Нов Зеланд смислиле бизарен уред за слабеење кој се прицврстува на забите и не дозволува лицето кое го носи да ја отвори устата повеќе од два милиметри.

Лицето со тоа е „осудено“ на течна диета, но наводно може да зборува нормално и нема да има потешкотии со дишењето, пренесува „Independent“.

Уредот наречен „DentalSlim Diet Control“ се прикачува на долните и горните катници, а устата е „заклучена“ со магнет.

Истражувачите од Универзитетот во Отаго наведуваат дека луѓето кои го користеле овој уред во двонеделниот тест период изгубиле во просек 6,36 килограми и биле „мотивирани да го продолжат своето патување до идеалната телесна тежина“.

Професорот Пол Бартон од Универзитетот во Отаго тврди дека тоа е „ефикасна, безбедна и прифатлива алатка за луѓе кои се борат со вишокот килограми“.

Тој верува дека главниот проблем на луѓето кои се обидуваат да ослабат е упорноста и тврди дека овој уред ќе им помогне „да воспостават нови навики и да функционираат со нискокалорична диета за одреден временски период“. Тој исто така го нарече овој уред „алтернатива за хируршки зафат“ и тврди дека нема штетни последици.

На ова се спротивстави Дин Џејд, основач и директор на Националниот центар за нарушувања во исхраната, која го нарече уредот одвратен.

„Кога зборуваме за слабеење, не станува збор за нешто што ве спречува да ставате храна во устата. Ние се обидуваме да направиме промени во начинот на размислување, начинот на живот, вештините и стратегиите што луѓето треба да ги научат за да го променат својот став кон храната за цел живот“, изјави таа за „Индипендент“.