Колку и да сте здрави и среќни – времето на крајот ќе победи.

Со текот на годините, очекуваниот животен век на човекот се повеќе расте, што значи дека можеме да очекуваме да живееме подолго од нашите предци.

Жителите на Шпанија имаат највисок животен век (83,3 години) во рамките на Европската унија, а жителите на Бугарија имаат најнизок (71,4 години).

Најстарата личност која некогаш живеела била Жан Калмент, која доживеела до 122 години. Родена е во 1875 година, а починала во 1997 година.

Додека повеќето луѓе не се ни блиску до тоа, научниците одлучија да се обидат да откријат колку долго човечкото тело теоретски би можело да живее.

Истражувачите од сингапурската биотехнолошка компанија Gero и Roswell Park Comprehensive Cancer Center во Бафало ја проучувале човечката отпорност, способноста на телото да се опорави од оштетување. Тие употребиле вештачка интелигенција за да ги разгледаат медицинските податоци на стотици илјади доброволци за да го проценат максималниот човечки животен век.

Земајќи ги предвид годините, болеста и стилот на живот, откриле дека најдолгото што некој некогаш ќе живее е околу 150 години.

Други студии за науката за стареење сугерираат дека рекордот за најстара личност на светот веројатно повторно ќе биде соборен до 2100 година, но дека повеќето нема да доживеат длабока старост од 122 години.