Астероид со големина на мостот „Голден гејт“ во Сан Франциско се приближува кон Земјата, но безбедно ќе прелета покрај неа на 5 јуни оваа година, објавија странските медиуми.

Овој астероид е поголем од 97 проценти од ваквите небесни тела, а неговото приближување кон Земјата е ретка појава. Без оглед на неговата големина, астероидот наречен „2008 DG5“ нема да претставува никаква закана за Земјата.

Ова тело има димензии од 310 на 690 метри, и затоа е меѓу трите проценти од најголемите астероиди, според веб-страницата „Спејс референс“.

Тој ќе се приближи кон Земјата на 3,49 милиони километри, што е растојание девет пати поголемо од растојанието на Месечината од Земјата.

Иако тоа не звучи блиску, Европската вселенска агенција соопшти дека секое приближување на толку голем астероид кон Земјата е редок феномен.

Доколку толку голем објект ја погоди Земјата, тоа би предизвикало голема штета и евентуално цунами и големи бранови, поради што НАСА го третира 2008 DG5 како „потенцијално опасно небесно тело“.

Овој астероид е откриен од телескопот Каталина скај во близина на градот Тусон, Аризона, во 2008 година. Следниот пат кога овој астероид ќе се приближи до Земјата е во 2032 година.