Италијанецот Тулијо Масони го произведува едно од најексклузивните вина во светот – „Виа Мари 10“, но не сака никој да го пие, пишува „Си-ен-ен“.

Претприемачот, колекционер на уметнички дела и поранешен инвестициски банкар го поседува, како што вели, најмалото лозје во светот.

Лозјето е сместено на врвот на палата од 16. век, во срцето на италијанскиот град Реџо Емилија. Сместен меѓу Парма и Модена, овој регион ѝ ги дал на Италија нејзините најпознати извозни производи – автомобилите Ферари и Ламборџини, но и познатите кулинарски производи како што се лазањите, тортелините, пршутата Парма и сосот Болоњезе.

Иако имал „вистинско“ лозје недалеку од градот, Тулијо Масони заклучил дека финансиски не му се исплаќа да го одржува, па го продал. Како што изјавил за „Си-ен-ен“, дваесет години подоцна се покајал за оваа одлука, па си направил „џебно“ лозје.

На простор од 18,5 квадратни метри, Масони одгледува грозје санџовезе за 29 шишиња вино годишно, кои се продаваат во уметничката галерија „Бонсони Арте“, неколку улици подолу, за неверојатни 5.000 евра.

„Моето вино е форма на уметничко изразување, филозофска провокација, нешто што треба да се чува во дневната соба за да можете да разговарате за тоа со вашите пријатели, да им кажете за лудакот кој изгради лозје на покривот“, рече Масони, кој неговото урбано лозје го споредува со велосипедското тркало на францускиот уметник Марсел Дишан – обично тркало што уметникот го поставил на стол во неговото студио во Париз во 1913 година, а набргу потоа ја дизајнирал познатата серија обични предмети претставени како уметност, наречена Редимејдс.

„Ако видите велосипедско тркало во дневната соба, а не во гаражата, ќе сфатите колку е убаво. Моето лозје е такво: неочекувано, го стимулира мозокот, поттикнува нови мисли. ‘Виа Мари 10’ е психо вино, масажер за мозок, нашата сива материја атрофирана од конвенциите и мисловните обрасци. Тоа е вино на жива креативност, симулакрум на современи противречности на реалноста“, вели винарот.

Врската помеѓу виното на Масони и уметноста започнува со винова лоза која расте на решетките, дело на локалниот скулптор Оскар Акорси. Виното е сместено во уметнички дабови буриња од локалниот уметник Лоренцо Меноци, кои претставуваат маж и жена. Џузепе Камунколи, познатиот стрип-уметник на Марвел, кој е роден во Реџо Емилија, ги потпишува етикетите на виното. Поради сето ова, Масони ги охрабрува своите клиенти никогаш да не ги отвораат шишињата, туку да ги третираат како уметнички дела.

„Јас сум единствениот производител на вино во светот кој вели дека не треба да го пиете неговото вино“, рече тој.