Најмалку двајца рудари ги загубија животите, а десетици се затрупани при уривање во рудник за јаглен во кинескиот автономен регион Внатрешна Монголија, пренесува агенцијата Анадолија.

Според веста што ја објави Кинеската државна новинска агенција „Синхуа“, не се знае судбината на повеќе од 50 рудари кои работеле во урнатиот дел од рудникот.

Екипите за пребарување и спасување досега пронајдоа мртви тела на двајца рудари, додека еден рудар жив е извлечен од рудникот.

Властите се загрижени дека е можно бројот на загинати да се зголеми.

Кинескиот претседател нареди спасувачка операција, а премиерот Ли Кечијанг побара брза истрага за причините за несреќата.

Автономниот регион Внатрешна Монголија кој се протега на огромна површина, познат е како еден од најбогатите региони во Кина од аспект на минералните ресурси.