Популарната јужнокорејска серија „Игра на лигни“ („Squid Game“) официјално ќе заврши со третата сезона, која ќе има премиера на 27 јуни годинава, потврди „Нетфликс“, а пренесе „Ел“.

Креаторот Хванг Донг-хјук првично немал намера да работи на продолженија, но поради огромниот глобален успех на првата сезона и финансиските фактори, одлучил да ја доврши приказната со уште две сезони.

Финалето на втората сезона отвори многу прашања, особено во врска со судбината на главниот лик, Ки-хун. Дали ќе продолжи да се бори против системот или ќе се откаже? Како ќе се развие неговата конфронтација со Фронтменот? Дали мистериозниот остров ќе биде откриен и ќе има ли обид за спасување на играчите? Креаторот Хванг не открива многу детали, но во изјава за медиумите нагласи дека сезоната ќе биде „поинтензивна од претходната“ и дека „крајот ќе биде неочекуван“.

Се очекува да се вратат главните ликови кои преживеаја во втората сезона, вклучувајќи ги: Ли Џунг-џе (Ки-хун, Играч 456), Ли Бјунг-хун (Фронтменот), Ви Ха-џун (Хванг Џун-хо), Јанг Донг-геун (Играч 007), Канг Ае-шим (Играч 149), Канг Ха-неул (Играч 388), Парк Сунг-хун (Играч 120), Парк Гју-јунг (еден од „Розовите стражари“). Нетфликс сè уште не објавил информации за евентуални нови ликови во третата сезона.

Засега, Нетфликс нема објавено ни официјални снимки или трејлер за последната сезона. Единствена навестувачка сцена беше прикажана во финалето на втората сезона, каде што се појавува препознатливата Јанг-хи, куклата од играта „Црвено светло, зелено светло“, заедно со уште една гигантска кукла. Ова сугерира дека следниот предизвик ќе биде уште поопасен.

Со завршувањето на втората сезона и претстојната трета сезона, фановите на „Игра на лигни“ можат да очекуваат возбудлив крај на приказната, кој според зборовите на креаторот Хванг „ќе ги изненади сите“.

Што всушност се крие зад серијата „Squid Game“? Во јавноста протекуваат морничави детали од минатото на Јужна Кореја