Девет претстави во официјалната и пет во независната програма беа селектирани за 59. издание на Македонскиот театарски фестивал „Војдан Чернодрински“, што се одржа од 6 до 13 јуни во Прилеп.

Фестивалот се одржа под мотото „Смеј се и осмели се“. Во фантастична фестивалска атмосфера во Прилеп беше претставено најдоброто од македонската театарска продукција.

Во составот на меѓународното стручно жири што одлучуваше за наградите беа Лилија Абаџиева (претседател) − театарска режисерка и педагог, Нела Оташевиќ − продуцент во Црногорско народно позориште и Иван Меденица − театролог и универзитетски професор.

Стручното жири на 59. МТФ „Војдан Чернодрински“ донесе одлука да ги додели следните награди: 1. Награда за рекламен материјал со мнозинство на гласови додели на Медина Хоџа за рекламниот материјал од претставата „Слепци“ во изведба на НУ Турски театар – Скопје; 2. Награда за кореографија и сценски движења со мнозинство на гласови додели на Васил Зафирчев за кореографија и сценски движења во претставата „Рацин“ во изведба на НУ НТ „Јордан Хаџи-Константинов – Џинот“ – Велес; 3. Награда за музика „Филип Стевановски“ едногласно додели на Сашко Костов за музиката во претставата „Рацин“ во изведба на НТ „Јордан Хаџи-Константинов – Џинот“ – Велес; 4. Награда за костимографија едногласно додели на Самка Фери за костимите во претставата „Ричард III“ во изведба на НУ Албански театар – Скопје; 5. Награда за сценографија едногласно додели на Валентин Светозарев за сценографија во претставата „Рацин“ во изведба на НУ НТ „Јордан Хаџи-Константинов Џинот“ – Велес; 6. Награда за современа сценска драматизација и адаптација едногласно додели на Јелена Цветановска за драматизација и адаптација на текстот „Црно семе“ во претставата „Црно семе“ во изведба на НУ Народен Театар – Битола; 7. Награда за современ драмски текст со мнозинство на гласови додели на Ана Ристоска Трпеноска за текстот „Парови“ во претставата „Парови“ во изведба на НУ Драмски театар – Скопје; 8. Награда за млад актер „Трајко Чоревски“ со мнозинство на гласови додели на Атанас Атанасовски за улогата на „Оскар Медисон“ во претставата „Пар-распар“ во изведба на НУ Театар Комедија Скопје; 9. Награда за млада актерка едногласно додели на Слаѓана Вујошевиќ за улогата во претставата „Слепци“ во изведба на НУ Турски Театар – Скопје; 10. Награда за женска епизодна улога со мнозинство на гласови додели на Маја Љутков за улогата на „Гвендолин Пиџн“ во претставата „Пар-распар“ во изведба на НУ Театар Комедија – Скопје; 11. Награда за машка епизодна улога „Димче Трајковски“ со мнозинство гласови додели на Оливер Митковски за улогата на „10“ во претставата „12“ во изведба на НУ МНТ – Скопје; 12. Награда за главна женска улога едногласно додели на Марија Минчева Андонов за улогата на „Мајката“ во претставата „Сите прекрасни нешта“ во изведба на НУЦК „Ацо Шопов“ – Штип; 13. Награда за главна машка улога едногласно додели на Мартин Мирчевски за улогата на „Доне Совичанов“ во претставата „Црно семе“ во изведба на НУ Народен театар Битола; 14. Награда за режија со мнозинство гласови додели на Ќендрим Ријани за режијата на претставата „Слепци“ во изведба на НУ Турски театар – Скопје; 15. Награда за уметничко остварување на претставата во целина со мнозинство гласови додели на ансамблот на НУ МНТ за уметничко остварување во претставата „12“; и Специјална награда за колективна актерска игра едногласно додели на ансамблот на НУ МНТ – Скопје за претставата „12“.

За првпат од кога е повторно востановена наградата од публика претставата „Слепци“ на Турски театар – Скопје освои највисока оценка (5,00) од публиката.