Честитајќи ги новогодишните и божиќните празници на својата публика, Националната опера и балет извести дека традиционалниот Гала оперски концерт по повод празникот Василица ќе се одржи на 12 и 13 јануари 2024 година, со почеток во 20 часот.

Националната опера и балет го востанови концертот „Василица“ во 1995 година и низ годините потоа, тој стана препознатлив, популарен и еден од најпосетените настани на установата.

Традицијата продолжува и оваа година, а публиката ќе има можност да ужива во изведбите на некои од највпечатливите и најпопуларни арии, дуети, хорски делници и балетски точки од светски познатите дела од композиторите Џ. Росини, В.А. Моцарт, В. Белини, Џ. Верди, У. Џордано, Ф. Лехар, Ж. Бизе, Џ. Пучини, Е. Калман, П. И. Чајковски и други.

Под диригентската палка на гостинот од Канада, Клод Лапалм, врвен диригент, добитник на голем број престижни награди и признанија, и во режија на Дејан Прошев ќе настапат оперските солисти Весна Ѓиновска Илкова, Сандра Митровска, Благица Поп Томова, Наде Талевска, Николина Јаневска, Биљана Јосифов, Зоран Сотиров, Александар Стефаноски, Марјан Јованоски, Ристе Велков, Игор Дурловски, Владимир Саздовски заедно со хорот, оркестарот и балетот на Националната опера и балет.

Концерт-мајстор е Јане Бакевски, хор-мајстори се Ѓурѓица Дашиќ и Јасмина Ѓорѓеска, а кореограф е Саша Евтимова.

Билетите се пуштени во продажба на билетарницата и онлајн, известија од Националната опера и балет.