Театарската претстава „Анатомија на неверството“ во режија на Александра Кардалевска ќе има изведба на 28 февруари, со почеток од 20 часот, на големата сцена во Театар Комедија.

Во претставата играат актерката Жаклина Петровска и актерот Тони Денковски.

– Низ неколку засебни едночинки во кои истите актери толкуваат различни карактери, претставата зборува за неверството, бракот и воопшто машко-женските љубовни односи. Ликовите во сите едночинки се поставени во парадоксални ситуации, а самото сиже, спојувајќи две противречни состојби, претставува оксиморон кој го изразува самото неверство како болно задоволство, односно пријатна сензација што создава проблеми. На тој начин претставата игра по тенката линија на сарказмот и апсурдот создавајќи истовремено хумористични и драматични ситуации – истакнува режисерката Александра Кардалевска.

Претставата е поставена според текст на авторот Валентин Красногоров, драматург е Дарко Јан Спасов, а костимографијата е на Ивана Каранфиловска.

Билетите за претставата се достапни на билетарницата во Театар Комедија и онлајн преку www.online.teatarkomedija.mk.