Италијанскиот моден дизајнер Давид Рене почина во петокот, 10 ноември, на 46-годишна возраст. Тој стана креативен директор на модниот бренд „Москино“ пред десетина дена.

Тажната вест ја потврди Масимо Ферети, извршниот директор на „Aeffe“, компанијата која го поседува брендот „Москино”.

„Нема зборови кои можат да ја опишат болката која ја доживуваме во ова драматично време. Давид стана дел од нас пред само неколку дена. Ненадејната болест ни го зеде прерано. Ние сѐ уште не можеме да поверуваме што се случи.

Заедно со него, ние работевме на еден амбициозен проект, со голем ентузијазам и оптимизам за иднината. Иако беше многу кратко со нас, Давид уживаше голема почит и симпатии меѓу вработените. Изразуваме длабоко сочуство до семејството и неговите пријатели”, изјави Ферети.

Рене на водечката позиција во „Москино” дојде со импресивно портфолио, по две децении поминати во „Гучи“ каде последните години беше главен дизајнер на женската линија.