Заморот од трите средби во пет дена на завршниот турнир од АБА2, емотивната испразнетост по обезбеденото враќање во јадранската елита и неиграњето на Војдан Стојановски (ситна повреда) се поголемиот дел од причините поради кои МЗТ Скопје Аеродром вечерва, како гостин, не успеа да ја реши енигмата наречена ТФТ (73:69) на стартот од Суперлигата.

„Сино-белите“ доминираа во првото полувреме, но не го спречија налетот на нивниот противник во второто, особено во финишот од третиот и од последниот период, кога ТФТ направи серија 13:3 односно 8:3, доволна за да го совлада составот на Петровиќ.

Адем Мекиќ со 14 поени беше најпрецизен во редовите на МЗТ, додека Дамјан Стојановски додаде 11 поени со седум скока. За „металците“ дебитираше Американецот Бре Ајви со шест постигнати поени.

На спротивната страна Американецот Ландриус Хортон постигна 17 поени.

Без разлика на поразот, МЗТ Скопје останува сигурно втор на табелата во Суперлигата со скор 19-4, две победи помалку во однос на лидерот Пелистер и дури четири повеќе во однос на најблискиот конкурент, Еуро Никел. ТФТ е на четвртото место со 37 бодови.