Во рамки на јубилејното 45. издание на манифестацијата „Скопско лето“, на 27 јули (сабота), со почеток во 20:30 часот, во Сули ан ќе се одржи мултимедијалниот перформанс „Во моите чевли“. Автор и изведувач на проектот е Јована Зајкова, додека костимограф е Соња Геговска – Зајкова.

Заедно со изведувачот, публиката патува низ палета на различни чевли, кои претставуваат различни карактери, предизвици и гледишта, во внимателен хармонично-хаотичен свет. Оваа приказна во себе содржи многу хумор и дури може да наликува на перформанс наменет за деца. Сепак, во овој лесен и шеговит пристап се крие многу силна порака за отворање на срцето, живеење на животот до максимум и пронаоѓање на убавината во тешкотиите на животот.

Јована го кореографира солото „Во моите чевли“ во 2023 година и со него настапува на фестивали во Полска, Србија, Белгија, Германија и Хрватска. Перформансот е добитник на Втора награда на Фестивалот за кореографски минијатури во Белград во 2023 година.

Јована Зајкова е професионален танчер и кореограф. Таа ги завршува додипломските студии при Универзитетот „Гоце Делчев“ во Штип во 2020 г., каде што се здобива со диплома за современ танчер под менторство на проф. д-р Рисима Рисимкин. Во текот на студиите Јована стажира како дел од „Скопје танцовиот театар“ и учествува во голем број изведби на фестивали во земјата и надвор.

Таа се појавува како кореограф и изведувач на повеќе авторски проекти, меѓу кои „Парадоксот на Диоген“, „УПМ“, „Јовано, Јованке“, „Самовили и демони“. Покрај работа како професионален танчер на сцена, во музички спотови и реклами, Јована држи часови по танц и работилници за деца и возрасни.