Посветени сме на интеграцијата, но подеднакво и на одбраната на нашето достоинство и правото да бидеме тоа што сме — без услови, без извинување, без бришење, порача министерот за надворешни работи, Тимчо Муцунски на обраќањето на меѓународната конференција Budapest Global Dialogue 2025, што се одржува во Будимпешта, во организација на Унгарскиот институт за меѓународни прашања и Фондацијата за следење на истражувањата.

Во обраќањето, Муцунски истакнал дека нашиот јазик, идентитет и културно-историскиот континуитет не можат да бидат предмет на преговори.

-Македонскиот народ ја има платено цената на трпение и компромиси, и додадов дека постојат линии што нема да ги преминеме — затоа што тие не прават тоа што сме. Ова не е став на инает, туку на самопочит. Иднината во Европа мора да се гради врз заемно признавање и доверба, а не врз бришење на историјата или наметнати наративи – порачал тој.

На конференцијата ја нагласил важноста од водење проактивна и кохезивна европска политика, особено во услови на зголемена глобална нестабилност и променлив геополитички контекст.

-Посилна и подобро координирана Европа, заедно со одржување на ефективна трансатлантска врска, се клучни предуслови за справување со надворешните предизвици и за зачувување на безбедноста и просперитетот на континентот. Европската интеграција на регионот не треба да се гледа исклучиво низ призмата на (гео)политички избор, туку како заедничка стратешка потреба и заедничка одговорност – заклучил тој.