Можно е македонските репрезентативци, капитенот Никола Ѓоргиев и брат му Ѓорѓи, како и Александар Љафтов, да го засилат тимот на ОК Струмица за дуелите со грчки Олимпијакос од квалификациите за групната фаза на Лигата на шампионите.

Никола и Ѓорѓи Ѓоргиеви веќе тренираат со ОК Струмица. Иако тие се уште официјално не се играчи на овој клуб, може и тоа да се случи, ако во меѓувреме евентуално не најдат ангажман во клубови од странство.

Нивните договори со странските клубови во кои играа до минатата сезона се веќе истечени и тие се слободни играчи.

Слична е ситуацијата и со Александар Љафтов кој е во Скопје.

Клубот Струмица може да ги пријави како свои играчи на еден ден од одржувањето на првиот меч Струмица – Олимпијакос, кој се игра во вторник во Струмица.

Оваа информација ни ја даде Кире Ричлиев, тренерот на македонскиот шампион ОК Струмица.

– Браќата Ѓоргиеви тренираат со нашата екипа, а Љафтов е во Скопје. Тие сега не се наши играчи, но можеби ќе станат дел од нашиот тим, ако во меѓувреме не најдат ангажман во некој странски клуб. Ако станат наши играчи, тоа ќе биде многу големо засилување за дуелите со Олимпијакос. Грчкиот тим е многу силен и исходот би бил неизвесен, а неповолно за нас е што реваншот се игра во Грција – ни изјави Ричлиев.

Ако го помине Олимпијакос, Струмица ќе мора да помине уште една квалификациска пречка за да дојде до групната фаза од ЛШ, а ако не, продолжува во Купот ЦЕВ.

ОК Струмица веќе се засили со неколку одбојкари во пресрет на мечот со Олимпијакос. Тоа се македонските репрезентативци Дарко Ангеловски, Филип Маџунков, Филип Лепидовски и Украинецот Роман Волков.