Ракометарите на Еурофарм Пелистер ја продолжија одличната серија во второто по ранг натпреварување на ЕХФ, Европската лига и вечерва ја впишаа четвртата победа во низа.

Во Битола падна данскиот вицешампион ГОГ Гудме со 32:31, во натпревар со многу пресврти, борбена игра и блесок на играчите предводени од тренерот Жељко Бабиќ.

На прес конференцијата после мечот импресиите ги споделија ракометарот на Еурофарм Пелистер Јосип Периќ и помошникот тренер Божидар Мојсов.

– Ние очекувавме ваков натпревар, знаевме дека противниците играат брзо, одлично и дека имаат четворица репрезентативци светски шампиони. Ова за нас е една голема победа, затоа што и покрај сите проблеми што ги имаме, ние ги надминуваме. Имавме многу проблеми со повреди и со ситуацијата каква што е, но денеска покажавме дека ние сме тим кој може да смета на секој играч. Ова беше одлична игра, многу сме среќни заради победата и пред сè затоа што пред сè добивме една комплетна екипа – се зборовите на Мојсов.

Босанскиот плејмејкер Периќ кој беше втор стрелец со седум погодоци исто така е среќен поради триумфот:

– Честитки до противникот на навистина одличниот натпревар. Знаевме како играат и многу силно се подготвувавмеза оваа средба. Ова е голема, голема победа за нашата екипа со оглед на тоа што ни недостасуваат многу важни играчи. Мислам дека ова беше нашиот најдобар натпревар во Европската лига. Многу сум среќен и горд на својата екипа – рече Периќ.