В среда од 20.45 часот во салата „Боро Чурлевски“ во Битола, актуелниот македонски првак Еурофарм Пелистер ќе го одигра вториот натпревар сезонава во ракометната Лига на шампионите.

По тесниот пораз во првото коло во Франција од ПСЖ со 31:29, нов противник на играчите на тренерот Бранислав Ангеловски е Фуксе Берлин.

Во рамките од групата „А“ на стартот германскиот претставник на домашен терен загуби минимално од Веспрем со 32:31, меч кој го судеа Славе Николов и Ѓорѓи Начевски.

– Фуксе Берлин игра доста добра одбрана, гранитна одбрана, со тешки и големи играчи кои лесно се трансформираат во напад и полуконтра. Го има најдобриот десен бек на светот и МВП на Олимписките игри во Париз, и на европски и светски првенства, Матијас Гидсел. За нас ќе биде задоволство да се игра против таков ривал и нема што да загубиме, само можеме да добиеме многу.

За нас ќе биде нова шанса за докажување, нова можност за претставување пред домашната публика. Прв натпревар на домашен терен, очекуваме полна сала и огромна поддршка од трибините, и со нивна помош да пробаме да го оствариме тоа што не успеавме во претходниот меч со ПСЖ – вели голманот на Еурофарм Пелистер, Никола Митревски.

Во останатите мечеви од второто коло се среќаваат: Висла Плоцк – Динамо Букурешт (среда, 18.45 часот), Веспрем – ПСЖ (четврток, 18.45 часот) и Фредедициа – Спортинг (четврток, 18.45 часот).