Министерот за здравство Арбен Таравари бил под опсервација во болница откако вчера имал ненадеен колапс. Оваа информација беше објавена на официјалниот фејсбук-профил на министерот. Според наведеното, тој бил под медицинска опсервација бидејќи докторите не можеле да дојдат до заклучок што се случило. Извори на „Слободен печат“ од Министерството за здравство брифираат дека тој веќе е префрлен дома.

-Почитувани и еднакво сакани, вчера се прошири информација дека сум имал срцев удар. Бидејќи секогаш сум бил искрен со вас, ве информирам што се случи. Доживеав ненадеен колапс и ме однесоа во болница. Уште сум под опсервација зашто моите колеги уште немаат дојдено до заклучок што ми е. Но, добар сум, со семејството сум и чекам одговори од докторите. Сакав да ви кажам дека не очекував толку голема грижа и добрина од вас. Ви благодарам од дното на срцето – пишува на профилот на Таравари.