На централната свеченост по повод 34-годишнината од осамостојувањето на Македонија, премиерот Христијан Мицкоски истакна дека 8 Септември не е само датум, туку континуитет на жедта на македонскиот народ за слобода и своја држава.

„Денес повторно сме исправени пред времиња што бараат храброст и одлучност. И повторно мора да го направиме вистинскиот избор – изборот на работа, изборот на заедништво, изборот на иднина што ќе ја оставиме на нашите деца. Независноста не е само потпис и хартија – таа е жртва, таа е борба, таа е љубов кон оваа света земја“, порача Мицкоски.

Премиерот се осврна на изминатите 34 години независност, нагласувајќи дека секој лидер има обврска да се поклони пред оние кои се бореле и се надевале на самостојна држава. Тој најави неселективна правда, подобар животен стандард и борба за зголемување на наталитетот, но и посочи дека едно од големите потфрлања е чувството на разочараност од системот.

„Тоа незадоволство е пред сè поради неправедното водење на политиката, мачната транзиција и криминалот кој ја разјадуваше државата. Богатите што нечесно заработуваат не лежат во затвор. И ова мора да се смени, а правдата да не прави разлика кој од каде е или колку пари има“, истакна Мицкоски.

Премиерот подвлече дека од првиот ден кога ја презел одговорноста да ја води државата, не заборава на граѓаните и дека иднината на татковината зависи од заеднички придонес.

„Нашата татковина има иднина, и сите ние мораме да придонесеме. Јас не дојдов за богатство или име, туку за да оставам трага за мојот народ и да создадеме заедно иднина за нашите деца“, додаде Мицкоски.