Претседателот на ВМРО-ДПМНЕ, Христијан Мицкоски, зборувајќи на трибината во Куманово ,,Од енергетска стабилност до силна економија“, се осврна на критиките на опозицијата за Извештајот на Европскиот парламент. Тој ја обвини опозицијата дека додека биле на власт направиле грешки и коруптивни политики кои довеле до оваа ситуација Македонија да се соочува сега со национални компромиси.

Според Мицкоски, нивните политики се предавство на македонскиот народ и на Македонија.

„Имам само една порака до СДСМ и опозицијата, кои не чекаа дури и да заврши гласањето во Европскиот парламент. А тоа е, засрамете се. Треба да ви е срам. Тоа што им го правите на македонскиот народ, на македонските граѓани и на Македонија како држава.

Помни народот и за фотографиите од авиончето со пораки дека сме ги почнале преговорите. Памети народот како го лажевте и вие од СДСМ и ДУИ и Стево Пендаровски, кога излегоа и го прифатија последниот предлог во кој сега нашата Македонија има опција. Или народот да се откаже од својот идентитет под уцени од Бугарија, или нема придвижување кон ЕУ. Затоа ќе ја повторам мојата порака: Срам сте за Македонија и за македонските граѓани“ порача Мицкоски.

Мицкоски нагласи дека СДСМ и ДУИ не ја зборуваа вистината пред македонските граѓани, и дека тоа го претставуваа само како една мала интервенција која треба да се направи во Уставот.

„Да не беше прифаќањето на оној последен предлог, со којшто лажевте и не ја говоревте вистината пред македонските граѓаните и македонскиот народ, дека е обезбеден и македонскиот идентитет и македонскиот јазик, дека се обезбедени стратешките приоритети, дека само треба една мала интервенција да направиме во Уставот и тука завршува се, наеднаш млеко ќе почне да тече по улиците и мед.

Тоа беше најголемата лага којашто за догледно време ги затвори вратите во Европа, за македонскиот народ и за македонски граѓани. Тоа е суштината која што тие ја направија. Тоа е болката која што тие му ја нанесоа на македонскиот народ и на македонските граѓани“ рече тој.