Јапонецот Јошифуми Мураками (49) е уапсен поради попречување на полициската работа во Токио затоа што наводно се јавил на бројот за итни случаи повеќе од илјада пати и молчел откако ја воспоставил врската, пренесуваат јапонските медиуми.

„Таквото јавување ми го смирува мозокот“, рекол осомничениот Мураками.

Тој тврди дека по професија е лекар, но полицијата допрва треба да ја потврди таа информација.

Мураками е уапсен во вторникот под сомнение дека ја попречувал работата на полицијата, бидејќи во периодот од 30 август до 17 септември направил вкупно 1.301 ваков повик, а само за еден ден 183 пати повикал полиција, се прецизира во соопштението на полицијата.

Јапонската полиција го идентификуваше Мураками врз основа на паметниот телефон што го користел. Покрај повиците споменати во овој извештај, полицијата се сомнева дека Мураками е одговорен за уште 1.300 слични повици направени на други броеви на службите за итни случаи.