Меѓународниот театарски фестивал „Денови на комедија“ од 24 септември до 9 октомври ќе се одржи во Куманово
Во Центарот за култура „Трајко Прокопиев“ во Куманово од 24 септември до 9 октомври ќе се одржи 27. издание на Меѓународниот театарски фестивал „Денови на комедија“.
Препорачано
Градот Куманово, како и секоја година, и оваа ќе живее заедно со Фестивалот на комедијата, и како и секоја година очекува фестивалот да го задржи приматот на најпосетен театарски фестивал во Македонија.
Оваа година во програмата се селектирани 11 театарски претстави. Фестивалот ќе биде отворен на 24 септември со доделување на наградата „Васил Иљоски“ на овогодишниот лауреат, актерот Сашко Коцев, која се доделува за особен придонес во театарската дејност, особено во делот на комедијата.
Одлуката беше донесена од Советот на фестивалот во состав: Владанка Крстевски, Александра Михајловска Величковски, Крсто Богојевски, Сефедин Шабани, Цоки Ристовски и Сашо Тодоровски. Истата вечер на отворањето на фестивалот ќе настапат гостите од Театар „Џинот“ од Велес со претставата „Вечера за глупаци“.
Следните вечери на фестивалот ќе бидат изведени претставите „Секс, лаги и љубомора“ на Народен театар Охрид, „Фустан за бегство“ на Драматичен куклен театар од Враца, Бугарија, „Автопат Сагбама“ на Позориште „Бора Станковиќ“ од Врање, Србија, „Пар распар“ на Театар Комедија од Скопје, „Итроштините на Патук“ на Тетовскиот театар, „Се бара нов маж“ на Драмско куклен театар Плевен, Бугарија, „Мажи во влечки“ на Албанската драма на Театар Куманово, „Женидба“ на Народен театар Штип, „Кокошке“ на Народно позориште од Ниш. На 8 октомври ќе биде изведена премиерата на претставата „Ноќ спроти Водици (Како што сакате)“ во режија на Срѓан Јаниќијевиќ на Театар Куманово, кој традиционално ја затвора фестивалската програма со нова претстава на репертоарот.
На последната фестивалска вечер, на 9 октомври ќе се доделат и наградите за најдобра актерка и актер, најдобра споредна улога (машка и женска), најдобра режија, сценографија, костимографија и најдобра претстава.
Освен со официјалната програма на претстави кои влегуваат во конкуренција за награда, планирани се и две вечери со изведба на студентски претстави. Оваа година на фестивалот ќе учествуваат Факултетот за драмски уметности од Скопје и Универзитетот за аудиовизуелни уметности ЕСРА, а нивните претстави ќе бидат изведени на 30 септември и на 7 октомври.
(Текстот е објавен во „Културен печат“ број 248, во печатеното издание на весникот „Слободен печат“ на 21-22.09.2024)
