Американскиот претседател Доналд Трамп изјави дека шефот на владиниот оддел за ефикасност, милијардерот Илон Маск, открил дека администрацијата на претходниот претседател Џо Бајден издвоила вртоглави „100 милиони долари за купување кондоми за Хамас“, пишува „Тајмс оф Израел“.

Овие наводи за првпат минатата недела ги изнесе портпаролката на Белата куќа, Керолин Левит, која рече дека „биле издвоени 50 милиони долари за купување кондоми во Газа“, но таа не го спомена Хамас и не наведе други детали.

Поранешен функционер во администрацијата на Бајден задолжен за израелско-палестинските прашања, според израелскиот весник, ги отфрлил таквите тврдења. Новинари од десетици медиуми кои ги проверија овие тврдења, заклучија дека се лажни.

„Тајмс оф Израел“ пишува дека Американската агенција за меѓународен развој (УСАИД) во 2023 година доделила вкупно 60 милиони долари за различни контрацептивни средства во држави ширум светот. Како што покажуваат податоците на УСАИД, воопшто не се издвоени средства за набавка на кондоми за каде било на Блискиот Исток.

Трамп претходно денеска повторно изјави дека има намера да ја укине Американската агенција за меѓународен развој (УСАИД), која ја обвинува за наводно непромислено и непотребно трошење на парите на даночните обврзници.

Функционирањето на агенцијата е доведено во прашање откако администрацијата на Трамп објави дека размислува за спојување на УСАИД со Стејт департментот, со цел да се намали бројот на вработени во агенцијата и да се усогласат нејзините трошоци со политиката на Трамп „Америка на прво место“, соопшти агенцијата. .