Заменик претседателот на Владата за европски прашања Бојан Маричиќ денеска се сретна со австрискиот европратеник Кристиан Садгардс, во рамки на неговата мини- турнеа низ земјите од Западен Балкан.

Како што информираат од СЕП, фокусот на разговорот бил на неодамнешната посета на вицепремиерот Маричиќ на Париз и Брисел, како и политичкото расположение во земјава за дијалогот со Бугарија.

Европратеникот Сагардс изразил задоволство и очекување дека соработката помеѓу Северна Македонија и Бугарија за надминување на отворените прашања ќе даде резултат.

-Бидејќи има свежа сила и мотивација во двете нови влади. Вицепремиерот Маричиќ посочи и дека очекува принципиелна и објективна соработка од страна на опозицијата за процесот бидејќи овие прашања се прашања од национален интерес и сите политички чинители во земјава треба да бидат вклучени и да дадат свој придонес, се наведува во соопштението.

Маричиќ на европратеникот Сагардс му ги предочил приоритетите и целите кои си ги има поставено и лично, но и на Секретаријатот за европски прашања во претстојниот период за подготовка на преговарачката структура, напредок во клучните области како владеење на правото, борбата против корупцијата, заштита на животната средина и спроведување на зелената агенда, како и подобрување на апсорпцискиот капацитет за искористување на европските фондови.

Европратеникот Сагардс изразил поддршка за реформите кои оваа Влада ги спроведува, истакнувајќи дека интеграцијата на Северна Македонија во ЕУ, но и на целиот Западен Балкан е од интерес и на Австрија и на Унијата и стартот на преговорите не треба да се одложува.