Хероината Марија Крстеска, во екот на својата кариера како млада балерина останала бремена на само 19 години. Соочена со сериозен животен предизвик којшто покрај тоа што комплетно и го менува животниот тек, плановите, воедно и го менува и телото. Како изгледа тоа во мислите и чувствата на една перфектно изградена балерина со витко тело, девојка којашто се лишила од многу задоволства за да има добра форма?!

– Стефи ја родив на 20 години, а на 19 останав бремена. Бев многу млада за нешто такво и реално не бев подготвена психички за да станам мајка. Да бидам искрена бев многу исплашена како ќе се носам со улогата, бидејќи да се биде мајка не е едноставно. Не бев подготвена. Тогаш не сакав промени на телото, се плашев дали повторно ќе си го вратам телото, бидејќи кај нас балерините естетиката е многу важна – вели Крстеска за „Мамавизија“.

Во „Мамавизија“ овојпат зборуваме за една мајка балерина и една ќерка балерина. За тоа како изгледа кога детето ги одбира стапките на родителот и со текот на животот станува ни помалку ни повеќе туку една од најдобрите осум балерини во светот! Тоа е нашата македонска гордост, балерината Стефанија Гаштарска, којашто со волшебна леснотија чекори на сцената. Таа која со својата милозвучност и топлина на нејзиниот глас ги освои срцата на корисниците на социјалните мрежи, па нејзините следбеници со душа чекаат ново видео од неа.

Тие ќе ни ги раскажат од свој агол личните доживувања за оваа совршена уметност.
Успехот на Стефанија се препишува токму на хероината-мајка Марија, којашто се соочила со сериозни финансиски предизвици за да и ги отвори раскошните патишта на нејзината ќерка.

Петнаесеттото издание на „Мамавизја“ ви ја носи оваа убава и инспиративна приказна којашто веруваме дека ќе го задржи вашето внимание.
Гледајте „Мамавизја“ на јутјуб каналот на „Слободен печат“. Водителка и авторка на емисијата е Александра Вуксановиќ.