Во осмата епизода на „Мамавизија“ ви носиме многу емоции, можеби и по некоја солза. Светлана Јаневска е поранешна телевизиска новинарка, која веќе долги години живее во Австралија. Се охрабри да зборува за смртта на нејзината мајка, за нејзиниот живот и за спомените со неа. Нејзината мајка Рада ја губи битката со ракот на грлото на матката. Светлана во нејзина чест ја напиша книгата „Летот на мојата гулабица“.

– Последен пат  со мајка ми се видовме во Скопје, си поминавме многу убаво, таа тогаш не ми кажа дека е болна. Откако се вратив во Австралија по неколку месеци таа на видео-врска ми ја соопшти информацијата, но некако многу радосно го кажа тоа, со смирувачки тон, знаете она родителското да не се грижам. Паметам рече „не грижи се, веќе се презема сè околу лекувањето, ќе биде се добро“ – вели Јаневска за „Мамавизија“.

Најтажната вест Јаневска ја дознава од нејзиниот брат на Велики четврток.

– Како да го губиш тлото под нозете, како да те удира гром, се чувствуваш немоќно. Врската на далечина дополнително ја отежнува болката. Јас се обидував да бидам со неа максимално колку што беше можно до последниот момент, до последниот здив што се вели. Многу ми е тешко што не присуствував на погребот на мојата мајка физички, но благодарение на моите блиски и технологијата го следев патот на нејзиното вечно почивалиште онлајн. Тоа е многу тешко, не се опишува. Никој да не го почувствува никогаш, без разлика за која блиска личност станува збор – рече таа.

Со оваа епизода на „Мамавизја“ покрај тоа што ви носиме уште една приказна која ќе допре до вашите срца, во исто време потсетуваме на важноста за редовни прегледи и контроли.

Премиерното издание на новата „Мамавизја“ ќе се емитува вечерва со почеток во 20 часот на јутјуб-каналот на „Слободен печат“.

Водителка и автор на емисијата е Александра Вуксановиќ.