Вљубениците во модата, архитектурата и дизајнот си добија нов, убав креативен простор, центар каде ќе можат да ги задоволат своите естетски апетити. Зружени со заднички сили, тројца архитекти и една модна дизајнерка деновиве промовираа нов креативен центар, насловен како „МАЛА“, наменет за сите кои сакаат таму да организираат изложба, презентација или пак некаква работилница.

Колкава е веројатноста да четворица млади креативци раштркани низ Европа во својот професионален пат, се пресретнат, препознаат и сплотат во ентузијазмот за реализирање на заедничка идеја ? Но велат случајните средби не се случајни па архитектите Ерик Јуришевич, Мирјана Лозановска и Силвија Шалева во еден момент ќе го здружат својот креативен потенцијал и младешки ентузијазам и ќе го оформат архитектонското студио Контра.

Нивниот професионален спој во рекордно време ќе даде исклучителни резултати и ќе вроди со мноштво награди на интернационални конкурси.

Потикнати и понесени од постигнатото ќе се охрабрат да ја реализираат идејата за нова иницијатива, со поинаков концепт на функционирање вметнат во минималистички ентериер. Еден вид на локален „активатор“ за занаетчии, скулптори, дизајнери или секој што чувствува потреба да се придружи и да ги сподели своите концепти и ставови во областа на дизајнот, архитектурата и занаетчиството.

Сите  четворица низ своите постојани патувања низ Европа ќе бидат сведоци на многу слични вакви креативни простори. Од таму и ќе се согласат во идејата  дека токму на Скопје му недостасува едно вакво креативно катче.

Овој простор е искреиран од нив четворица, но истиот не е наменет исклучиво за нив. Имаат годишен динамичен план според кој ќе се раководат и истиот дополнително ќе го презентираат.

 Со последните трендови модата и архитектурата трпат промени, реагираат, се приспособуваат и ја докажуваат својата флексибилност. Токму таква е првата соработка е колекцијата на Ена Зафировска „THE BEGINNING“ која е инспирирана од претставувањето на КОНТРА со MO·NU·MENT на овогодинешното 17-то Венециско Биенале, претставена на Експо 30.

„Спојот на мода и архитектура во Скопје за мене е од посебно значење. За последната колекција бев инспирирана од архитектурата односно од нивниот павиљон во Венеција. Колекцијата беше прикажана на Експо 30 во Скопје. Тоа беше и убав начин да го отвориме и нашио мал простор, кој се надевам дека убаво ќе се вклопи во целокупното урбано живеење во градот“, вели модната дизајнерка Евгенија Зафировска.

Мало по обем но ислкучително топло како атмосфера појавата на  ова ново креативно катче како можност за креативно изразување , без сомнеж пополнува една празнина во урбаното живеење на градот.

КОНТРА е младо архитектонско студио, кое во изминатите неколку години постигна одлични резултати на низа натпревари од областа на архитектурата и дизајнот. Ерик Јуришевич, МирјанаЛозановска и Силвија Шалева станаа препознатливи по нивниот пристап со современ карактеристичен и живописен израз за презентирање на нивните архитектонски проекти. Со тоа тие претставуваат различен пристап, за разбирање и артикулирање на просторот во кој живееме. Наградите и признанијата за нивните проекти беа голем мотив за иднината.

Меѓу неколкуте наградени натпревари се:

1-во место за средно училиште и спортска сала во Вуковар, Хрватска;

1-во место на Меѓународен конкурс за архитектура и урбан дизајн на општинска зграда и главниот плоштад во Зеница, Босна и Херцеговина;

1 место за дизајн и обнова на Плоштад на традиционални  занаети во  Вараждин, Хрватска;

Второ  место за  Здравствен дом  во Загреб, Хрватска.

4-то место за градинка во Стењевац во Загреб и Истражувачки центар „ZICER“ во Осиjек, Хрватска.

Денес КОНТРА зафаќа повеќе локации во зависност од тековните проекти.

Во  моментов  на релација  Словенија – Хрватска каде работат на завршна фаза на изведба на проектите за Средно економско училиште во Вуковар и обновување на Градскиот плоштад во Вараждин. На почетокот на 2021 година, проектот на Плоштадот на традиционалните занаети во Вараждин беше номиниран за наградата „Mies van der Rohe“ 2022 година.