Заменик министерот за животна средина и просторно планирање Јани Макрадули при денешната посета на ООУ „Живко Брајковски” во Општина Бутел на новинарско прашање посочи дека има многу контроверзии за ископот на песок од речните корита и оти тоа треба да се води централизирано.

– Апсолутно ги поддржувам наодите на Државниот завод за ревизија. Мислам дека има многу контроверзии во црпењето на песок. Ми требаат дополнителни контроли. За жал, повеќе различни чинители учествуваат во тој процес и тука процедурата е таква  што од многу одговорни на крајот никој не е одговорен. Мислам дека тоа треба да се централизира и само на тој начин полесно ќе дојдеме до поефикасна контрола на она што се случува на реките низ земјата- рече Макрадули.

Се согласувам, посочи тој, дека животната средина не е само аерозагадувањето, туку и реките, водата, почвата и мора да се стави крај на разни контроверзии.

– Ова полесно ќе се конролира доколку тоа се води централизирано. Кога пет институции се одговорни на крај за жал излегува дека никој не е одговорен- рече тој.