Македонските ракометари на 10 мај во Диселдорф ќе ги дознаат ривалите на Европското првенство 2024
Еден ден по завршувањето на квалификациите, Европската ракометна федерација (ЕХФ) ги објави шеширите пред жрепката преку која ќе ги дознаеме сите групи на следното Европско првенство кое ќе се одржи во Германија од 10 до 28 јануари 2024 година.
Препорачано
Во жрепката која ќе се одржи на 10 мај од 17.45 часот во Диселфорд ќе биде и најдобрата македонска репрезентација која го освои второто место во квалификациската група „1“ зад Португалија, а пред Турција и Луксембург.
Вкупно 24 репрезентации ќе играат на континенталниот собир, а нашите најдобри ракометари предводени од селекторот Кирил Лазаров ќе бидат во третиот шешир заедно со Хрватска, Босна и Херцеговина, Полска, Чешка и Србија, и овие селекции не можат да им бидат ривали во прелиминарната фаза на ЕП.
Шешир 1: Шведска, Шпанија, Данска, Франција, Норвешка, Исланд
Шешир 2: Германија, Холандија, Словенија, Унгарија, Португалија, Австрија
Шешир 3: Хрватска, Босна и Херцеговина, Полска, Чешка, Србија, Македонија
Шешир 4: Швајцарија, Романија, Црна Гора, Грција, Грузија, Фарски Острови
На жрепката ќе бидат извлечени шест групи од по четири репрезентации во прелиминарната фаза. Веќе е познато дека Германија ќе биде носител во групата „А“ со која ќе започне ЕП во Дизелдорф, па ќе продолжи во Берлин.
Потоа, Хрватска е носител во групата „Б“ во Манхајм, Исланд го започнува својот поход во групата „Ц“ во Минхен. Норвешка веќе е сместена во групата „Д“ во Берлин. Актуелниот европски шампион Шведска ја предводи групата „Е“ во Манхајм и светскиот првак Данска е во групата „Ф“ во Минхен. Првите две репрезентации од секоја група ќе се пласираат во главната фаза.
