Најдобрата македонска одбојкарска репрезентација успешно стартуваше во квалификациите за пласман на Европското првенство во 2026 година со гостинскиот триумф над Грузија (3:0).

Нашите одбојкари предводени од селекторот Хари Наковски следниот квалификациски меч ќе го одиграат на 25 август против Грција во СЦ „Јане Сандански“ – Скопје.

Со победа македонската селекција ќе обезбеди пласман на следниот континентален шампионат кој ќе се организира во четири земји: Бугарија, Финска, Италија и Романија.

Капитенот Никола Ѓорѓиев е оптимист дека националниот тим ќе ја искористи шансата:

– Имавме одличен почеток на квалификациите, со убедлива победа над Грузија. Од кога јас сум во националниот тим, никогаш не сме имале триумф од 3:0 на стартот од квалификациски циклус. Првиот чекор е направен, в недела нè очекува дерби пресметка, противник кој што е на наше ниво, ако имаме добар ден, дисциплинирани посебно во блок одбрана, ги нападнеме со брз сервис, мислам дека можеме на крајот да славиме.

Калкулации нема, одиме на победа, јас како капитен и сите соиграчи сме подготвени да извојуваме победа и така широко ги отвориме вратите и 99% ќе го оствариме нашиот сон, сонот на оваа некоја нова генерација, иако има и повозрасни кои се во тимот. Сонот е да одиме на ЕП 2026. Ја повикувам публиката да дојде во што поголем број, да ни помогне, бидејќи нема да биде лесно и ветуваме дека ќе дадеме 100% од нас дека ќе ја израдуваме македонската нација и во недела ќе славиме Европско првенство – вели Ѓорѓиев.