Денеска во својот прв натпревар на Европското првенство Дивизија „Б“ за кошаркарки „Под 16“ години во Турција македонската женска репрезентација загуби од Грција убедливо со 76:47.

Избраничките на селекторот Оливер Стојмановиќ одлично го почнаа мечот, двапати имаа предност од „плус девет“ (11:2, 13:4), но во финишот од првата четвртина противничките направија пресврт и ги добија првите 10 минути со 19:17.

И тоа беше сè што направија нашите кошаркарки на овој меч, во втората четвртина грчката селекција само постепено ја зголемуваше својата позитива. За првпат во дуелот стигна до двоцифрени 29:19, а нешто подоцна дојдоа и до највисоки „плус 16“ (35:19), а пред паузата и 41:25.

Ништо не се промени резултатски во второто полувреме, растеше негативата на македонската селекција, Грција стекна водство од „плус 23“ на семафорот (51:28), а пред стартот на последните 10 минути (58:35, 60:37).

Сите дилеми околу победникот веќе беа решени, прашање беше само со колкава разлика Македонија ќе го запиша првиот пораз на ЕП, на крајот грчките кошаркарки стигнаа во финишот од средбата и до највисоки „плус 29“ разлика (74:45, 76:47).

Најефикасна во нашата селекција беше Јана Пислевска со 10 поени, а на спротивната страна по 11 поени запишаа Ефтимија Фустери и Евгенија Тумпаниари.

В четврток Македонија е слободна, а следниот меч во групата А ќе го има в петок од 12.00 часот против Бугарија.