Како што е веќе познато, Македонија ќе има пет борачи на Светското првенство во Белград (Србија) кое е во тек (10-18 септември) во „Штарк“ арената. Повеќе информации околу овој настан можете да погледнете ТУКА

Нашите натпреварувачи во слободен стил ги дознаа ривалите, Владимир Егоров во категоријата до 57 килограми во квалификациите ќе ги одмери силите против Ерменецот Манвел Хндзртсјан. Доколку триумфира Егоров, во осминафиналето ќе се бори против Мухамад Игромов (Таџикистан) или Дариан Тол Круз (Порторико).

Во категоријата до 61 кг. Бесир Алили во квалификациската рунда за ривал го има Реза Ахмадали Атригархи (Иран). Доколку Алили слави победа, во осминафиналето го чека Ислам Базарганов од Азербејџан.

Потоа, Фати Вејсели во категоријата до 70 кг. за противник во квалификациите го има Рамазан Елдарович Рамазанов од Бугарија. Доколку Вејсели биде подобар, во осминафиналната фаза ќе се бори со подобриот од пресметката Даниел Антал (Унгарија) – Бакар Ндум (Гвинеја-Бисау).

Во категоријата до 79 кг. во 1/16 финалето Дејан Митров ќе се бори против Чаба Вида (Унгарија). Доколку Митров слави, тогаш во осминафиналето ќе се соочи против Џордан Ернест Бероуз (САД) или Саергелди Сапармјрадов (Туркменистан).

И нашиот последен борач Могамедгаџи Нуров во категоријата до 97 кг. ќе ги прескокне квалификациите, директно е сметен во осминафиналето во кое ќе се бори против Бенџамин Конрад Хонис од Италија или Туерксунбиеке Мухеите од Кина. Доколку Нуров триумфира, тогаш во четвртфиналето за противник ќе има еден од тројцата борачи: Мамед Ибрагимов (Казахстан), Лукас Красаускас (Литванија) или Гиви Мачарашвили (Грузија).