Македонската тенисерка Магдалена Стоилковска по вчерашниот триумф во сингл, денеска со победа ги почна мечевите и во конкуренција на двојки на фјучрсот во Куршумлијска Бања, Србија (награден фонд 15.000 долари).

Заедно со Романката Сабина Дадациу (која ја победи вчера во поединечна конкуренција) ги совладаа Јована Грујиќ (Србија) и Паула Михаела Оница (Романија) со 2:0 во сетови 6:1, 6:0 за 44 минути игра.

Во следното коло Стоилковска и Дадациу ќе играат против првите носителки Тамара Чуровиќ и Бојана Маринковиќ од Србија.

Ова значи дека Стоилковска утре најверојатно ќе има и двојна програма бидејќи во мечот од второто коло во сингл ја очекува и мечот со квалификантката од Словенија Манца Пислак (25 години, 685 место ВТА).

Свој настап во Куршумлијска Бања имаше и Горазд Србљак кој во првото коло го победи квалификантот од Австралија, Стефан Вујиќ со 6:4, 3:6 и 6:3 за два часа и 44 минути игра.

Следен противник на нашиот тенисер ќе му биде Алесандро Белифемине од Италија (22 години, 1334 место АТП) кој турнирот го почна во квалификациите, а во првото коло го елиминираше седмиот носител Габриел Донев од Бугарија со 2:1 во сетови.