Ниту во Истанбул, Турција, најдобрите македонски борачи не успеаја да дојдат до норма за учество годинава на Летните олимписки игри во Париз.

Владимир Егоров во категоријата 57 кг. во првото коло од квалификациите на Светскиот олимписки квалификациски турнир во Истанбул триумфираше со 6:2 Мејиас Родригез од Венецуела, а во осминафиналето го совлада и Томас Еп од Швајцарија со 8:0. Следуваше пораз на Егоров во четвртфиналето од Американецот Спенсер Ричард Ли (12:2).

Со победа стартуваше и Магомедгаџи Нуров (категорија 97 кг.) во првото коло од квалификациите со 5:1 го совлада Деепак Нехра од Индија. Нуров во осминафиналната борба за ривал го имаше Ерик Тиеле, до последните секунди резултатот беше 1:1 со предност за нашиот натпреварувач, но со казнен поен ја загуби борбата која заврши 1:1 и триумф за Германецот.

Егоров и Нуров продолжија во репасаж, Егоров поради повреда на 1:25 пред крајот ја предаде борбата и заврши со триумф на Кинезот Зоу Ванхао од 7:0, додека Нуров по водство предност поради казнен поен од судиите загуби (2:3) од Магомед Ибрагимов (Узбекистан).

Од останатите македонски учесници, без борба во осминафиналето се пласираше Ахмад Магомедов (категорија 86 кг.) откако поради повреда се откажа неговиот ривал од Бахреин, Магомед Шарипов. Магомедов во осминафиналната фаза загуби со 6:4 од Германецот Ларс Шафле. Расул Шапиев (74 кг.) во првото коло (1/16 финале) по водство од 3:0 при последната акција од страна на противникот од Украина Вадим Тсуркан се здоби со тешка повреда и ја предаде борбата.

Во категоријата 65 кг. Бесир Алили загуби со 11:0 во квалификациите од Ахмет Дуран (Турција). Во женска конкуренција Веронија Рјабоволова (53 кг.) најпрвин запиша победа во првото коло од квалификациите со 5:0 над Фабиана Ринела од Италија, па беше поразена во осминафиналето од Лаура Хенин Авила од Куба.

Марија Цветанова, која беше најмлада учесничка од нашата селекција, се бореше во категоријата до 57 кг. и во првото квалификациско коло загуби од Швеѓанката Евелина Хултен (10:0).