Денеска во салата „Парк“ во Струмица од 20.15 часот најдобрата македонска одбојкарска репрезентација ќе го игра првиот натпревар од Европската златна лига против Естонија.

Инаку првиот турнир од ова натпреварување е во Струмица од петок до недела (17-19 мај) и ќе има по еден меч дневно.

В сабота од 20.15 часот Чешка ќе игра против Естонија, а во недела во истиот термин Чесите ќе бидат ривали на избраниците на новиот селектор Хари Наковски.

Состав на македонската одбојкарска репрезентација:

Техничари: Ѓорѓи Ѓорѓиев (Бурса-Турција), Давид Стојанов (Фужинар-Словенија)

Коректори: Никола Ѓорѓиев (АЦХ Љубљана – Словенија), Стојче Арсов (Работнички 71&22), Кристијан Илиев (Струмица 47&72)

Примачи: Владо Милев (Струмица 47&72), Лука Костиќ (Рибница – Србија), Стојан Илиев (Анагенисис – Кипар), Тоше Ефремов (Весна Пробиштип), Ангел Бошков (Работнички 71&22)

Средни блокери: Филип Маџунков (Хасроде – Белгија), Филип Савовски (Војводина – Србија), Филип Лепидовски (Таково – Србија), Михајло Мирасчиев (Штип УГД)

Либера: Дарко Ангеловски (Работнички 71&22), Костадин Ричлиев (Штип УГД).

Европската златна лига е значајно натпреварување, но главната цел на нашите најдобри одбојкари летово ќе бидат двата квалификациски натпревари за пласман на следното Европско првенство кое според новиот календар на ЦЕВ, наместо во 2025, ќе биде организирано во 2026 година. Македонија е во група со Грузија и со Грција, во август ќе гостуваме кај Грузијците и ќе играме дома против Грците, што значи дека уште по тие два меча може да се случи „црвено-жолтите“ да направат значаен, можеби и клучен чекор кон четврти настап на континенталните собири едноподруго.