В недела (15 септември) од 14.00 часот ќе се игра финалето на Светското првенство во Кина помеѓу репрезентациите на Шпанија и Аргентина, единствените без пораз и имаат по седум максимални победи.

Токму Скола (39) е еден од најзаслужните за третото историско финале на Аргентина на светските шампионати каде што во историјата имаат едно злато и сребро.

После скоро 70 години „гаучосите“ повторно ќе се борат за светската титула, а ривал ќе им биде „фуријата“ која славеше во полуфиналето над Австралија.

Големото НБА искуство на центарот настапувајќи за Хјустон Рокетс, Феникс Санс, Индијана Пејсерс, Торонто Репторс и Бруклин Нетс е секако пресудно за одличните резултати на аргентинската репрезентација на СП.

– Многумина ме гледаа како „лудак“ пред две години, но изгледа дека не сум баш толку луд. Овој тим ме потсетува на златната генерација, на исто место сме каде што бевме и во 2002 година – рече Скола.

Да потсетиме, на светскиот шампионат пред 17 години настапуваше Скола во состав со Џинобили, Ночиони, Оберто, итн. кога Аргентина загуби во финалето од тогашна Југославија.

Скола и на 39 години постигнува на секој меч по 20 и повеќе поени, игра како вистински МВП, а воедно им помага на помладите со богатото искуство.

– Сакам да играм кошарка, да помогнам колку што можам на теренот. Чувствувам дека можам да играм и малку ми е непријатно кога ми велат што донесувам во соблекувалната и на клупата. Дојдов на СП да играм и чувствувам некој внатрешен „немир“, но сакам да играм кошарка и тоа е она што сакам да правам – додаде Скола.